يا من تكره الفيزياء

جميل بس عشان انتى اللى جايباه يا نودا

اشكرك جدا على انك قد وفيت بوعدك واتحتى لنا فرصة قراءة كتاب محترم مثل هذا
هل لى ان اقدم لك اقتراحا
لماذ لا تقومين بتلخيص الكتاب وتقديمة فى ندوة بالقسم
انا شخصيا مستعد للمساعدة
وبالمناسبة منذ ثلاثين عاما ، فى بدايات الثمانينيات، ومع بدايات الجامعة كان لدينا جماعة اسمها جماعة الكتاب، كانت فكرتها تقوم على انه ربما اتيح لك ان تقرأ كتابا جيدا، وربما اتيحت لى قراءة كتاب جيد اخر، فاذا تقابلنا انا وانت ( وبالمناسبة الساعة كام وفين) وحكى كل منا للاخر عن الكتاب الذى قرأة، فالمحصلة اننى وانت سنكون قد قرأنا كتابين بمجهود كتاب واحد، فما بالك لو كنا عشرة او عشرين او جماعة اسمها جماعة الكتاب، ولقد قدمنا ندوات رائعة كثيرة اذكر منها كتاب التنبؤ العلمى ومستقبل البشريةللاستاذ الدكتور عبد المحسن صالح، وكتاب قصة ثورة 23 يوليو للاستاذ احمد حمروش، وكتاب القرآن والانجيل والتوراة والعلم الحديث لبوريس بوكاى، ومثلث برموداالذى لا اذكر مؤلفه ولكن اذكر ان مقدمته كانت اول طالبة تقدم اسهاماتها فى الجماعة، وغيرها مما ضيع الالزهايمر ملامحها من ذاكرتى
والله يا نودا نحن نود ان نعيد الفكرة ولنبدأ بكتابك

شكرا يا نهاد علي الكتاب الجميل ده
وفعلا يا دكتور حلوه اوي فكره جماعه الكتاب انا مش عارفه ليه الحاجات المفيده ليه مش بتستمر وفعلا يا ريت يا دكتور فكره جماعه الكتاب دي ترجع تاني ولو ممكن حتي نعملها في المنتدي ولو في حد قرأ كتاب ويقدر يلخصه ويعمله في المنتدي دي فعلا فكره جميله . انا كنت طرحت موضوع قبل كده ان كل واحد يدخل ويقول ايه اكتر كتاب عجبه بحيث ان يشجع غيره علي قراته .بس مع الاسف محدش كتير رد شكل الناس مع الاسف بطلت تقرأ. بس فكره تلخيص الكتاب اللي قرأناه دي فكره فعلا احسن من طرح اسم الكتاب بس الموضوع ده محتاج مجهود

لعزيزة الغالية سعاد، اشكرك على ردك الواضح الذى استظرف الفكرة التى عرضتها، ومن اجل ذلك اقدم لك وجميع اعضاء المنتدى الهدية التالية:

مكتبة إلكترونية شاملة ومتنوعة تضم تشكيلة منوعة من الكتب ومن جميع التصانيف كالعلوم الشرعية وأصول الفقة والسير والتراجم والأنساب والأدب والفكر والتراث والتاريـخ والجـغرافـيا وعلـم الاجـتماع والعلـوم والقـصص والروايـات والـمعاجـم والموسوعات .. الخ .. وحرصاً من المكتبة على توفير وإتاحة الكتب الإلكترونية للجميع حتي يستفيد منها أكبر قدر من الباحثين والمهتمين , سوف يضاف إليها كتب أخرى في المستقبل وستكون الصفحة دائماً متجددة وبشكل مستمر بإذن الله . هنا مكتبتي // مكتبة شاملة لجميع العلوم...تجدونها ان شاء الله على الموقع التالى
http://huna- maktbty.blogspot .com/

متمنيا لك كل السعادة والهناء، وبالمناسبة يا سعاد الناس بطلت تقرأ وليس الناس بطلت تقراء كما جاء فى ردك، ولك تحياتى

اولا شكرا يا دكتور على الرد وشكرا جداااااااا على فكرة الجماعة بجد فكرة هايلة ياااريت نعملها فى القسم انا واحدة من الناس اللى مبتقرأش كتير ولما بقرأ كتاب غالبا مش بخلصه بقلب فيه بس اقرأ اجزاء منه وعموما كتاب يا من تكره الفيزياء فعلا محتاج يتعمل فى مناقشة لانه ما شاء الله بيشرح حال الفيزياء فى هذا العصر وبيبين اهميتها وانا مستعدة انى اشرحه فى ندوة زى ما حضرتك قلت وان شاء الله هعدى على حضرتك بكرة فى الكلية ونشوف اذا امكن عمل ندوة

سعاااااد ربنا يخلى العفو على ايه انا بحب الفيزياء جدا ونفسى الناس تغير الفكرة دى وشكراااا على مجهودك فى المنتدى بصراحة بتضيفى مواضيع قيمة جزاكى الله خير وطب شكراااااااااا لدكتور مجدى على المكتبة اللى قدمهالنا وياارب اقدر اقرأ منها حاجة لان الدراسة بدأت خلاص

يا نهاد المشكلة فى المادة نفسها المشكلة فى اللى بيدرسو المادة اصلا لو كنتى بتحبيها منهم هتكرهيها

على اى الاحوال انا اوافق على ان من يقوم بتدريس اى مادة قد يجذب اليها الطالب او يكرهة فى عيشته، ولكن الا يحدث ذلك فى جميع مناحى الحياة، الا تجدين طبيبا عظيما فى علمه وخبرته ومع ذلك لا تجدين عليه اقبالا من المرضى، بينما الاقل منه علما وخبرة اكثر منه رواجا، والمهندس والمحامى وكل المهن الاخرى التى قد تتعلق بها قلوب الناس لا لشيئ الا لان مقدموها ممن يقدمونها بطريقة تأخذ بالالباب،
ثم والله ليس هناك مادة صعبة ومادة سهلة، فيه قدرات لديك ورغبات عندك هى التى تجعلها سهلة او صعبة
انا مثلا اميل الى المعادلات والى الرياضة واستنتاجاتها، بينما اكره موت، والله موت، كل العلوم الوصفية التى لا تحتاج الا لذاكرة قوية لديها القدرة على استدعاء المعلومة من المخزن العقلى،واعلم اننى مللت دراسة البيولوجى بكل انواعة ما كان منه نبات او حيوان او حتى علوم بحار على الرغم من روعة الذين كانوا يدرسونها على ايامى وجمالهم! وكذلك الجيولوجياوجدت بينى وبينها صخورا وجبالا وانهارا متيبسة على الرغم من عمالقة اساتذة الجيولوجى الذين كان لى حظ الاستماع اليهم ، بينما ابحرت وبسهولة فى روعة الفيزياء والرياضة والكيمياء، وازمع انه من الاكيد ان اساتذة عظماء عمالقة كان لروعتهم فى تقديم مادتهم كل الاثر فى داخلى، وكان هناك اخرون لم يعطهم الله قدرة عرض المعلومات التى وهبهم الله اياها فلم استفد منهم شيئا
ومع ذلك فقد كانت لرغبتى الشخصية فى دراسة الفيزياء الاثر الاهم
اذا فلنحب ما نعمل ام تعمل ما نحب هو السؤال الذى يجب ان نبحث له عن اجابة من هذا الحديث الطويل الممل ، مع اعتذارى عن ملله
واخيرا، بلاش حكاية التعصب للفيزياء او للكيمياء او غيرهما، فالحكاية ليست تعصبا لناد فى مباراة كرة قدم، او هكذا يجب الا تكون، دكاترتنا احسن من دكاترتكم موضوع يجب ان نهرب من فخ الوقوع فيه، والا ايه!!!!!!!!!

فعلا انا مع ناريمان المشكله في اللي بيدرس الماده نفسها . الفيزياء من اجمل العلوم التي تجيب علي معظم الاسئله اللي في دماغي . انا واحده من اللي دخلوا كليه علوم عشان ادخل قسم فيزيا تحديدا والحمد لله دخلت . بس مع الاسف مقدرتش ادرس الفيزيا اللي انا بحبها وكان معظم الدكاتره الا من رحم ربي معندهمش موهبه في شرح الماده العلميه وفي ناس تانيه عندهم ماده علميه جامده وعمرهم ماحاولو يشرحولنا منها حاجه كانو بيقولولنا ذاكرو الورق ده او ذاكرو الموضوع ده من غير حتي ما يحاولو يقولو في حاجه . فكان كلنا طلبه قسم الفيزيا الهدف عندنا من الدراسه ان احنا نعدي وننجح او نجيب تقدير ومش مهم نفهم الماده ولا لا.تفتكرو اللي متخرج من قسم الفيزيا ومعندوش ماده علميه كويسه يقدر يوصلها لغيره بعد كده ولايقدر يحبب الناس فيها اصلا.

هكذا يجب الا تكون، دكاترتنا احسن من دكاترتكم موضوع يجب ان نهرب من فخ الوقوع فيه، والا ايه!!!!!!!!

والله يا دكتور هى مش مقارنا انا كان قصدى زى ما حضرتك قلت ان كل مكان فى الوحش والحلو والمهم اننا لا نفقد الامل ونحاول احنا نجتهد يااارب بس نقدر ان شاء الله

تفتكرو اللي متخرج من قسم الفيزيا ومعندوش ماده علميه كويسه يقدر يوصلها لغيره بعد كده ولايقدر يحبب الناس فيها اصلا.

بصراحة على الوضع الحالى اللى احنا فيه معتقدش ان حد مننا اتعلم صح على الاقل فى حاجات كتير نقصانا بس الفكرة اننا محتاجين مجهود شخصى ومثابرة على اننا نحقق هدفنا على فكرة صاحبة كتاب يا من تكره الفيزياء يا سعاد طالبعة عندها 21 وليها كتاب اخر فى النانو حتى لو اللى بيدرسولها ناس كويسه اكيد هى اجتهدت جااااااااامد عشان توصل لهدفها

صح يا نهاد كل مكان فيه الحلو والوحش والغلط مبيكونش عندهم هما بس فى تقصير مننا كمان بس لو معظم الناس فى المكان اللى احنا فيه من النوع الوحش فده بياثر علينا كتير كمان عشان احنا متعودناش نتعب عشان اللى عايزينه فطبيعى اننا نستسهل ومندورش على حاجة

انا معاكى طبعا يا ناريمان لانى بعانى من نفس المشكلة ان عودونا على طريقة للتعليم ودلوقتى بيطالبونا بطريقة تانية وغير اننا شايفين ان فاتنا كتير كان ممكن نتعلمه ومقصر على اللى جاى عموما ربنا يتولانا برحمته ويعدى سنة رابعة على خير