ميدان التحرير

شفتى يا مى اللى مبارك بيعمله مأجر ناس بلطجية ومنهم ناس من الشرطة لبسين لبس عادى عشان يعملو مظاهرات تأيده وتروح بالخيول والجمال تضرب فى المتظاهرين اللى فى الميدان اللى قعدين بكل هدوء بيهتفو بدون تخريب مش بقولك مش مطمنه لمبارك ده لو فعلا خايف على البلد يسبها للنائب بتاعه ويمشى ويريحنا

انا شيفه بعينى يا مى شايفة ناس قعدين فى الميدان وناس تانيه هى اللى هجمت عليهم والجيش سبهم زى ما الشرطة سبتنا قبل كده وعموما ربنا يستر فعلا

ازيك يانهاد انت و مي .معلش صوتي جاي متاخر بس النت لسه واصل عندي. وشكرا لايجابيتكم. بس عايزه اقولك يا نهاد ان اللي بيحصل من مظاهرات تاييد للريس دي مش حاجه متاجره ولا حاجه يا نهاد ولو حتي في ناس بتحاول ان ده يحصل ؟يمكن بعد الخطاب اللي القاه الرئيس اللي كان في كلام عاقل اوي في ناس كتير اتعاطفت اوي معاه . انا مامتي من الناس اللي بكت بعد خطاب الريس .احنا عندنا في القنطره وقري صغيره عمري مكنت اتوقع ان يكون فيهامظاهرات كان فيها مظاهرات جامده تأيد بعد خطاب الريس مش ناس مدفوعلها ولا حاجه.ايه المشكله لما راجل زي حسني مبارك يخرج من مصر بكرامه.... فعلا حكم مبارك مكنش الحكم اللي احنا عايزينه بس الراجل عمل حاجات كتير مش معملش مفيش حاجه تغفرله انه يخرج من حكمه بكرامه .يعني اللي مصبر الناس 30 سنه مش قادرين يصبرو الكام شهر ده بعد متوافق علي معظم الشروط وعلي الاقل منضيعش الحاجات الكويسه اللي حصلت في 30 سنه ونخرب مصر في ثانيه وكمان نقدر ناخد نفسنا ونقرر ونشوف هنقدر نختار مين يحكم بلدنا مصر ومنختارش حد اسوأ من مبارك
ونعيش في عصراسوأ..واكيد كلبنا شوفنا الناس الكتير اللي ظهرت تسعي ورا السلطه واهمهم طبعا البردعي والشخص ده طبعا لاتعليق . والحمد لله ان الناس عرفته علي حقيقته في الازمه دي اكتر . وناس كتير نفسها النظام يسقط ليس من اجل الحريه بل من اجل مصالح شخصيه ونسيو الوطن

اللهم احفظ وطننا الغالي مصر

اولا يا سعاد انا نفسى تعاطفت معاه واثقة ميه فى الميه ان فى ناس كتير تظاهرت بصدق بدافع انتهاء الازمة على خير حتى فى القاهرة ظهر فنانين قالو بنأيد بس محدش قرر انه يتحرك للتحرير انا بتكلم على اللى دخلو التحرير فعلا مش على الناس اللى بتأيد بدافع انتهاء الازمة الناس اللى دخلت بالحصنة والجمال والقنابل يا سعاد الناس دى تبع مين بالظبط هفرض معاكى انهم مش مأجورين فين الحكومة فين وزارة الدغاع والداخليه محدش اتحرك ولو حتى ببيان ينفى الكلام ويطمن الناس فين الامن اللى مبارك قال لن اتردد فى اتخاذ اى قرار يؤدى لامن الشعب فين ده فين الشرطة وبعدين يا فاطمة المتظاهرين فى التحرير هما اللى متاجرين وفى اسماعيلية وفى السويس اللى رفضين مبارك متاجرين برضو الناس اللى قاعدين فى سلم وبيحمو بيتهم والممتلكات العامة هم اللى متاجرين من وجهة نظرك

ربنا يستر يا مى كلنا نفسنا نرجع لحياتنا الطبيعية حتى احنا اللى بعيد عن الاحداث نوعا ما والله مش عارفة اعمل حاجة غير انى اتابع الاخبار